На крајот на оваа седмица, Радио МОФ ви го претставува нашиот избор на топ вестите за изминатата недела, од областа на образованието, културата, граѓанското општество, политиката, животната средина…
Што ги одбележа изминатите седум дена, прочитајте во продолжение:
1. [Интервју] Кинезот Пол Јунг учи македонски јазик: Фасциниран сум од јазикот, културата и Кирил и Методиј
Кинезот Пол Јунг деновиве е во Македонија. Шета наоколу, среќава луѓе, открива локации. Но, не е од оние Кинези туристи што редовно ги гледате по плоштадот „Македонија“ како ги фотографираат „барокните“ фасади и споменици на „Скопје 2014“. Пол Јунг е тука на различна мисија. Уште пред неколку месеци решил да го изучува македонскиот јазик, за кој вели дека е уникатен и автентичен, а сега е дојден и подлабоко да се запознае со Македонија, со македонската култура и жителите.
2.[Фото] „Жал ми е за децата од новата генерација“, пораки врз паноата за новата градба кај ресторан „Парк“ во Охрид
„Жал ми е за децата од новата генерација“, „Лажат, сушат, градат, крадат“, „Канцер дивоградба“, „Плати ја ратата, врати ја каматата“. Ова се само некои од пораките кои со црвен спреј се испишани врз рекламните паноа на оградениот простор кај поранешниот култен ресторан „Парк“ во Охрид. Дел од испишаните пораки потсеќаат на стиховите од песните „Ратата“ на „3ject“ и Тони Зен и „Кензо Танге“ на „Druggy“.
3.Повеќе од две недели на веб-страницата на Железници стојат линкови за симнување пиратски содржини
Три линкови кои водат кон веб-страници за симнување на бесплатни пиратски содржини повеќе од две недели стојат на почетната страница на сајтот на Македонски железници транспорт (МЗТ). Еден од нив е вметнат во самиот текст каде што пишува „Дознајте ги најновите информации за Ковид-19 во Северна Македонија“, а линкот води кон веб-страницата „CrackySofts“, каде се тврди дека бесплатно може да се симне пиратска верзија на „Corel Draw x7“.
4. Шанса за Центар бара хумано наместо „решение“ за профит откако се расчистува „Треска“
Откако градоначалникот на Општина Центар, Горан Герасимовски се пофали дека се расчистува поранешна „Треска“ и побара поскоро донесување на регулациски план и носење ДУП само за овој простор, од Шанса за Центар велат дека одвојувањето веќе е донесено од претходниот општински Совет. Потсетуваат, веќе е спроведен Конкурс за локацијата, па стравуваат дека наместо да се спроведува, се одложува за сметка на „решението“ за продажба на државното земјиште и профит на приватници.
5.#РаскажиМи: „Појава“ од Маја Вулф
Овојпат во рубриката #РаскажиМи го читаме расказот „Појава“ од Маја Вулф.
