Стотина млади од Куманово организираа волонтерска акција за уредување на еден од парковите во градот. Во акцијата учествуваа ученици од средните училишта „Перо Наков“ и „Киро Бурназ“.
Младите го исчистија отпадот во паркот и поставија корпи за отпадоци, ја искосија тревата, ги уредија зелените површини и поставија жардинерии, ги заменија оштетените даски на клупите со нови, ги бојадисаа бетонските и металните конструкции во паркот и поставија ново осветлувањето во паркот.
Иницијативата на младите е резултат на подолгорочен процес којшто започна во април, кога учениците од различни етнички заедници се сретнаа за прв пат и дискутираа за проблемите со кои тие, како млади личности се соочуваат во својот град. Потоа учениците даваа конкретни предлози за решавање на проблемите и се сретнаа со градоначалникот на општината за да му врачат писмо со конкретни препораки за разубавување на градот.
„Чувствувавме дека сакаме да придонесеме за подобрување на локалната заедница и затоа доставуваме писмо со препораки преку кои веруваме дека ќе придонесеме кон нашата цел, подобрување на состојбата во инсфраструктурата на градот, истовремено овозможувајќи поубав простор за рекреација и слободно време на сите граѓани во нашиот град. Бидејќи овој парк се наоѓа во близина на училиште, но и во близина на неколку станбени објекти, неговото обновување е од суштинска важност за градот“, стои во писмото на учениците преку кое тие ја изразија својата подготвеност да се вклучат во волонтерска акција и побараа поддршка од општината за реализација на акцијата.
Акцијата беше спроведена со поддршка од општина Куманово и Проектот на УСАИД за меѓуетничка интеграција на младите во образованието, во соработка со Младински образовен форум. Проектот на УСАИД за меѓуетничка интеграција на младите во образованието е петгодишна иницијатива за зајакнување на меѓуетничката кохезија меѓу младите и развој на демократските и граѓанските однесувања. Преку создавање можности за учениците да се дружат и да соработуваат на разни граѓански иницијативи, проектот негува позитивни интеракции помеѓу етнички разновидната младина на ниво на училиште и заедница.