Романецот Аврам Јанку, кој веќе 48 дена плива по Дунав, од планината Шварцвалд, со желба за 60 дена да го преплива целиот тек на реката до местотo каде што се слева во Црно Море, денеска стигна во Нови Сад.
Во оваа авантура се впуштил на 20 јуни кога влегол во Дунав во подножјето на Шварцвалд, а оттoгаш, пливајќи поминал низ Германија, Австрија, Словачка, Унгарија и Хрватска, со желба да го преплива целиот тек на реката во должина од 2.860 километри за 60 дена и да влезе во Гинисовата книга на рекорди.
Avram Iancu a ajuns la Budapesta, după 1.210 km înot pe Dunăre#avramiancu #Dunare https://t.co/Km5aXDiFTz pic.twitter.com/II00d2WWtH
— Radio Timisoara (@Radio_Timisoara) July 30, 2017
„Романија влезе во Европска унија пред 10 години и тоа е една од причините зошто се одлучив на овој потфат, затоа што Дунав, кој поминува низ 10 држави и четири престолнини, на некој начин ја обединува цела Европа“, рекол Јанку.
Вели дека се чувствува добро, дека во Германија и во Австрија имал потешкотии и дека се соочил со бројни предизвици, но верува дека ќе стигне до целта.
„Во декември почнав со тренинзи за да бидам спремен. Вчера пливав 53 километри, а денеска до Штранд 34 и морам да кажам дека Дунав во Србија е многу попријатен отколку во Германија и Австрија, но не дозволувам времето да ми биде пречка, важно е да стигнам до целта“, рекол тој, кој инаку е библиотекар по професија.
Со својот подвиг, вели тој, сака да испрати порака дека ограничувањата кои луѓето ги поставуваат пред себе може да се надминат.
Инаку, овој Романец е познат по тоа што успеал да го преплива Ламанш, пливајќи 18 часа без прекин, 62 километри.