Најмалку шест лица загинаа кога демонстрантите лути од распределбата на помошта за храна се судрија со безбедносните сили во западен Авганистан, пренесе БиБиСи.
Насилството започна откако демонстрантите се собраа во Фирозкох, главниот град на покраината Гор, за да се пожалат за неуспехот да им се помогне на сиромашните за време на пандемијата на коронавирус.
Вооружени лица во толпата ја нападнале канцеларија на владата, поттикнувајќи ги безбедносните сили да отворат оган, велат од Министерството за внатрешни работи. Загинаа двајца полицајци и четворица цивили.
Локалниот волонтер на волонтерско радио Ахмадхан Навид беше меѓу убиените, објави Центарот за новинари во Авганистан.
Уште девет цивили и десет полицајци се повредени, соопшти Министерството за внатрешни работи.
Групата за човекови права Амнести Интернешнл повика на независна и ефикасна истрага за, како што рече, „употреба на непотребна и прекумерна сила“ што довела до убиство на цивилите.
Потпретседателот Амрулах Салех напиша на Фејсбук дека инцидентот е „шокантен“ и најави дека владата „сериозно го истражува“.
Тој, исто така, ги увери Авганистанците дека никој нема да биде изоставен при дистрибуирањето на помошта за храна за да им помогне на сиромашните, како резултат на ограничувањата што се наметнати за да се спречи ширењето на Ковид-19.
„Ќе дадеме поддршка во секој жител на оваа земја, на кој економски влијаеше коронавирусот“, додаде тој.
Претседателката на авганистанската Независна комисија за човекови права, за новинската агенција Ројтерс изјави дека изминатата недела примила поплаки дека помошта за храна неправилно се дистрибуира.
„Слушаме повторени поплаки од луѓе дека оние што ја примаат ограничената помош, не се оние кои се најзасегнати, туку се оние кои имаат врски со локалните власти“, рече Шахарзад Акбар.