Овојпат во рубриката #РаскажиМи го читаме краткиот расказ „Јазик“ од Јован Стрезовски, писател и поет кој со ова дело е застапен во антологијата на македонскиот кус расказ „Џинџуџе во земјата на афионите“, во издание на „Темплум“.
Јован Стрезовски (1931, Подгорци, Струшко) – поет, раскажувач, романсиер, писател за деца и млади. Автор е на десетина поетски книги, две книги со раскази, осум романи за возрасни, дваесеттина книги за деца, сценарија за филм и телевизиска драма… Во книгите „Тајни“ (1989) и „Сили“ (1992) се застапени над стотина негови кратки прозни текстови.
ЈАЗИК
Беше истражувач на примитивните народи. Со години ги опкружуваше џунглите во Африка. Доаѓајќи во допир со многу племиња, научи безброј јазици.
Еднаш дојде во допир со едно племе кое не знаеше никаков јазик. Им зборуваше тој на сите јазици кои ги знаеше или кои сметаше дека по сродност со други племиња им се блиски, но тие го гледаа зачудено, збунето, гестикулирајќи меѓу себе.
Кога виде старешината на племето дека не можат да се разберат со него, нареди да му се отсече јазикот. Му го отсекоа.
Сега и тој беше принуден да зборува како нив – гестикулирајќи со рацете.
Мачејќи се така долго, им го научи јазикот. И тие веќе не се плашеа од него. Зашто им се чинеше дека тој, преку говорот, им прави магии како оние племиња кои знаеа да зборуваат и од кои тие се плашеа. Јазикот го сметаа злодух, зашто гледаа: тие племиња што го знаеја да го зборуваат – се убиваа меѓусебе.
Петочната рубрика #РаскажиМи го промовира македонскиот јазик и современата фикција преку домашни и странски автори кои пишуваат или се преведени на мајчин јазик.
Заинтересираните за објавување на свој расказ во рубриката #РаскажиМи свои дела може да пратат на info@radiomof.mk, со куса биографија.
