Студиото за развој на видеоигри „Зинга“ ја повлекува оригиналната веб-игра „FarmVille“ на Фејсбук до крајот на годинава.
Претходно во јули, Фејсбук соопшти дека веќе нема да поддржува „флеш“ игри од 31 декември, истиот датум кога Adobe го повлекува Flash Player.
Играта беше огромен успех за „Зинга“. Првично беше објавена во 2009 година и имаше речиси 10 милиони активни корисници дневно за помалку од два месеци. За време на својата најголема популарност, околу 30 милиони луѓе играа „FarmVille“ дневно.
Следеше мобилна верзија и продолжение, но следните игри никогаш не ја доловија магијата на оригиналот, пишува „The Verge“.
Корисниците на „FarmVille“ ќе можат да продолжат да ја играат до 31-ви декември, по што таа трајно ќе се исклучи. Од „Зинга“ најавија дека мобилната верзија на „FarmVille 3“ ќе биде достапна наскоро ширум светот.