Британски научници тврдат дека развиле тест на крв и урина кој може да открие аутизам кај децата во рана фаза.
Истражувачите од Универзитетот во Ворвик велат дека тестот, за кој се верува дека е прв од ваков тип, може да води кон рани дијагнози на спектарот на аутистични нарушувања (САН) кај децата, кои потоа можат да добијат соодветен третман многу порано во нивниот живот, пренесува Гардијан.
САН главно влијае на социјалната интеракција и комуникација кај лицето, со симптоми кои можат да вклучуваат проблеми во говорот, компулсивно и/или репетитивно однесување, хиперактивност, вознемиреност и тешкотии за прилагодување кон нови окружувања.
Бидејќи постојат разни видови симптоим на САН, дијагнозата може да биде тешка и несигурна, особено во раните развојни фази. Според проценките еден од секои 100 луѓе во Велика Британија има САН, а повеќе машки од женски деца ја довиваат оваа дијагноза.
Научниците велат дека нивното истражување открило поврзаност помеѓу САН и оштетувања на протеините во крвната плазма. Тие ова го утврдиле како најверодостоен тест кој го развивале низ проверка во која откриле дека децата со САН имаат повисоки нивоа на одредени маркер-протеини и одредени шеќери .
За околу третина од случаите на САН причините се генетски, додека останатите случаи се верува дека се предизвикани од комбинација на фактори од околината, мутации и ретки генетски варијации. Сепак, научниците веруваат дека нивните тестови можат да откријат и се уште неидентификувани причинители за САН.
Тие исто така го потврдиле претходното верување дека мутациите на транспортерите на аминокиселини се генетска варијација поврзана со САН.
Научниот тим од Ворвик работеле заедно со колеги од Универзитетот во Болоња во Италија и го спровеле истражувањето на 38 деца со дијагностициран САН, додека други 31 деца, на возраст од 5 до 12 години, биле дел од контролна група. Од децата биле земани примероци од крв и урина за анализа.
Тимот од Ворвик откриле дека постојат хемиски разлики помеѓу двете групи. При дополнителна соработка со Универзитетот во Бирмингем, промените на различните хемиски соединенија биле комбинирани со алгоритми со помош на вештачка интелигенција за да развијат математички равенки за разликување на здравите примероци и оние на САН. Резултатот бил дијагностички тест кој е подобар од сите досегашни методи кои постојат.
Тие велат дека во иднина ќе треба истражувањето да се повтори на дополнителни групи деца за да се потврди успешноста на дијагнозата и да се утврди дали тестот може да идентификува САН од најрана возраст, колкава е веројатноста САН да се развие во потешко нарушување и да се увиди дали терапијата функционира.
Истражувањето било објавено во списаниеот „Молекуларен Аутизам“.