Наградата „Европски поет на слободата“ ќе биде доделена во март 2016 година во рамките на истоимениот меѓународен книжевен фестивал на кој ќе учествува и македонската писателка Лидија Димковска. Таа со својата поетска збирка „пХ неутрална за животот и смртта“ во конкуренија со уште шестмина номинирани поети ќе се бори за полската награда за поезија што ја доделуваат градот Гдањск и Градскиот институт за култура од Полска.
Наградата што важи за една од најпрестижните во Полска се доделува биенално и во 2016 година ќе биде доделена по четврти пат. Досега наградата ја добиле Уладзимир Арлоу од Беларусија, Дурс Грунбејн од Германија и Дорта Јагиќ од Хрватска.
Номинацијата се состои во интегрален препев на поетската книга на полски што во 2015 годиина ќе ја објави Институтот за урбана култура и издаваштво Слово/Слика на територијата, а жирито од сите седум поетски збирки ќе ја избере најдобрата што ќе ја добие наградата.
Заедно со поетите се номинирани и нивните препејувачи на полски јазик меѓу кои и Данута Ќирлиќ Страшинска која го препејува поетското творештво на Димковска на полски, а го преведе и нејзиниот роман „Скриена камера“.
За 2016 година жирито e составено од репрезентативните полски автори и критичари Криштоф Чижевски, Олга Токарчук, Павел Хуеле, Андреј Јагодински, Збигњев Миколејко, Криштоф Помиан и Станислав Росиек.
Покрај Димковска, номинирани се и авторите Јахја Хасан (Данска), Даниел Јонас (Португлија), Сергеј Стратановски (Русија), Ана Бландијана (Романија), Анико Полгар (Унгарија) и Вани Бјанкони (Швајцарија).