Стрипот Наскоро градот ќе падне на Ѓорѓе Јовановиќ ја освои главната награда на шестиот конкурс за стрип „Лифт“.
Тој победи во конкуренција на петнаесет стрипови од четиринаесет автори и авторки кои учествуваа на конкурсот.
„Стрипот се издвојува со ликовната рафинираност (Јовановиќ суверено владее со цртежот, боите, колажните моменти), т.е. со прецизниот уметнички ракопис кој ги преиспитува и проширува границите на медиумот. Уметникот заслужува пофалби и поради ангажираниот пристап, бескомпромисно сликајќи ги морничавиот град и мрачните луѓе (луцидното портретирање е уште една одлична одлика на авторот) во епоха на војни, страв и несигурност. А сепак, во целата констелација, како контраст, има и доволно хумор, игривост, луцидност… Атмосферата во Наскоро градот ќе падне драматуршки веродостојно ја оцртуваат стиховите од истоимената песна на израелскиот поет Амир Ор, кои на делото му даваат дополнителни историски и воени (секогаш актуелни, за жал) контекстуализации“, стои во објаснувањето на жирито составено од Никола Гелевски, Јана Јакимовска и Владимир Трајановски.
Жирито ги издвои и стриповите Let’s go Again на Иван Коминовски, во кој приказната е за млад цртач на стрипови кој не знае што да прави со себе и почнува разговор со сопствениот нацртан лик, како и стрипот Новиот Еден на Матеа Аризановска.
„Во секој случај, жирито им изразува благодарност на сите автори, низ сите шест години, што испраќаат стрипови и го одржуваат Лифт конкурсот не само жив туку и витален и поттикнувачки. Веруваме дека во годините пред нас конкурсот ќе расте, во секоја смисла“, велат организаторите.
Десетте најдобри стрипови од конкурсот објавени се во зборникот Лифт #6, традиционалниот придружник на наградата „Лифт“. Зборникот ќе биде објавен и во електронска форма, на Окно.