Самостојниот синдика на новинари на Македонија реагира на прекинувањето на работниот ангажман на Ивор Мицковски во телевизија „Телма“. Оттаму велат дека не се задоволни со начинот на кој е спроведен чинот.
„Нетранспарентната и несоодветна постапка на прекинот на работниот ангажман на нашиот член покажува дека лошите практики во македонското новинарство и натаму продолжуваат, наспроти прокламираните заложби за реформирање на медиумскиот сектор.
Вака извршениот чин наведува на сомневање на постоење надворешни и политички притисоци и остава простор за влевање страв кај вработените во медиумите и тренирање на послушност.
ССНМ остро протестира против ваквиот третман на новинарите и медиумските работници и уште еднаш укажува дека продолжувањето на ваквата пракса може да има несогледливи последици во вкупниот медиумски амбиент“, се вели во реакцијата на ССНМ.