Иницијативата „Поинаку“ од Битола, преку Фејсбук ги повикаа граѓаните на Битола на протест поради загадениот воздух, денеска пред Општината во 17 часот.
Од иницијативата порачуваат дека воздухот е загарантирано право со Устав, и додаваат дека не е важно од која партија или вера се граѓаните, поради како што велат, „сите заедно умираме“.
„Нема да бараме конкретни мерки оти веќе се имаме побарано и оти е веќе касно оваа зима, но ќе побараме итно да се сервисира мерната станица и општината да отвори неколку пунктови и да набави заштитни маски за сите Битолчани за да не го дишиме овој отров и барем да се заштитиме“, соопштуваат од „Поинаку“.
Тие порачуваат наместо граѓаните да седат цел ден на Фејсбук и да објавуваат колку е загадено, да се соберат на протест.
„Земете ги децата, мајките, татковците, роднините, браќа, сестри и излезете прво за вашите деца, па за вас и за сите шо ги сакате, оти вака повеќе не може, не се живее, умираме“, соопштија од „Поинаку“.