Впечатливата фотографија на 16-годишниот мигрант од Мали, Амаду Сумалија, ја освои првата награда на овогодишниот конкурс „Тејлор Весинг“ за најдобар портрет.
Авторот на фотографијата е шпанскиот фоторепортер Цезар Дезфули, а сликата е направена на 1-ви август минатата година, откако мигрантот бил спасен од Средоземното Море заедно со повеќе од 100 други луѓе.
Стручното жири објаснува дека во композицијата на Дезфули, која е избалансирана и прецизна, директноста на ликот на Сумалија е впечатлив и вознемирувачки, додека портретот моќно ја прикажува неговата загуба, осаменост и одлучност.
Авторот Дезфули вели дека портретот отскокнувал од останатите поради емоцијата која ја пренесува.
„Само што е спасен од европски брод, веројатно исполнувајќи го својот сон. Сепак, неговиот поглед и однесување покажуваат страв, недоверба и неизвесност, а истовремено и одлучност и сила“, рекол Дезуфли.
Годишната награда „Тејлор Весинг“ е една од најпрестижните светски награди за фотографија, на која се прикажуваат делата на највпечатливите модерни фотографи. За наградата аплицирале 2.423 фотографи, од 66 светски земји, со вкупно 5.717 фотографии.
Во продолжение дел од најдобрите фотографии, кои до 8-ми февруари ќе бидат изложени во Националната галерија на портрети во Лондон.