По реакцијата на иницијативата НаТочак, Министерството за внатрешни работи потврдува дека на семафорот пред ЕУ инфо центарот се случи сообраќајна несреќа меѓу полициско возило „Шкода Јети“ управувано полициски службеник и велосипедист.
„При незгодата велосипедистот В.Р. се здобил со телесни повреди, пренесен е во ГОБ ‘Свети Наум Охридски’, и по укажаната прва помош пуштен е на домашно лекување. СВР Скопје, заедно со Одделот за внатрешна контрола, криминалистички истраги и професионални стандарди работи на целосно расчистување на случајот“, соопштува МВР.
Претходно, велат од таму, на местото на сообраќајката бил извршен увид, а известен е и Јавен Обвинител при ОЈО Скопје.