Група млади луѓе решија да им дадат простор на сите визионери да понудат своја замисла како подобра верзија на она што веќе постои.
Концептот на „Визионирај“ е трибина со визиониери која ќе се случува на секое тримесечје и ќе биде тематски одредена. На секое тримесечје, „Визионирај“ ќе поканува, но и прима/разгледува предлози на луѓе од различни сфери и сектори кои јавно ќе сакаат да ги презентираат своите визии во петнаесет минути. После секое претставување на визиите, ќе следува сесија со прашања/одговори од страна на публиката.
Темата на првата трибина на Визионирај е „Верзии и Визии“, па сите оние кои имаат проблем со верзија на нешто во нашето општество, но имаат своја визија за подобрување можат да ни пишат и да се пријават да ни станат говорители.
Првата трибина ќе се случи на 18. ноември (сабота) од 15.00 до 20.00 часот во аулата на Филозофскиот и Филолошкиот факултет во Скопје.
„Со цел да направиме и организираме незаборавен настан имаме потреба од логистичка помош и поддршка од сите поединци, организации и/или фирми/компании кои сакаат да придонесат“, велат од тимот на „Визионирај“.
Сепак, бидејќи настанот е целосно на волонтерска база, тие имаат потреба од фотографи за време на настанот; дизајнери за изработка на неколку електронски банери и материјали; некој кој би овозможил освежување (пијалоци и ужинка) за време на петчасовната трибина; принт центри или фирми кои би направиле неколку маички со логото или беџеви, моливчиња, тетратки за публиката и гостите; медиуми и медиумска поддршка…
„Сите вие кои мислите дека можете да го поддржите случувањето на првата трибина, но и да учествувате во нејзиното организирање – контактирајте нѐ преку нашата фејсбук страница“, велат од „Визионирај“.