Пролетта доаѓа забрзано, а со тоа и најава за надоаѓачката годишна прослава на винилот, светскиот Record Store Day, велат од Младинскиот културен центар.
Од таму посочуваат дека на 22 април (сабота), АП(о)ТЕКА – МКЦ, во периодот од 12 до 17 часот органзира дневно дружење на платото пред МКЦ, по повод International Record Store Day 2023.
„Овој интернационален ‘Ден на независните музичките продавници’ во светски рамки се одржува од 2007, а овде во Македонија, таа убава традиција годинава ќе ја организираме по шести пат. Следејќи го генералниот концепт на прославата и ‘Record Store Day Macedonia 2023’ има свој „Амбасадор“, промотер на овој настан. Оваа чест, во светски рамки секогаш е наменета за музичари, кои со своите објави покажале несомнена почит и љубов кон физичките изданија (пред сѐ винилите) како доминантни носачи на звук и на овој или оној начин несебично го подржувале опстојувањето на малите музички продавници. Водејќи се од овие основни начела, честа да биде македонски Амбасадор на овогодишниот македонски Record Store Day, му ја доделуваме на Ивица Димитријевиќ, како долгогодишен активен музичар во Македонија, особено со неговите два музички состави SIZ и RIB чии албуми беа издадени на винил“, велат од МКЦ.
Само за потсетување, во 2017 година оваа почест му беше укажана на Васко Атанасоски, во 2018 на Влатко Стефановски, во 2019 на Стојче Цветановски, во 2021 на Александар Петрушевски-Пепе и во 2022 на Горан Трајковски.
„Годинава, по шести пат, на интернационално ниво се промовира уште една почест, ‘Worldwide Record Store Legend’, за страсно колекционерство и долгогодишна поддршка на физичките изданија како носачи на звук (пред сè на винилот) и континуирана поддршка на малите и независни музички продавници“, соопштува МКЦ.
Тие сметаат дека кај нас, честа да биде промовиран во нова македонска „Worldwide Record Store Legend 2023“, треба да му припадне на Младен Најдоски, пензиониран пожарникар од Велес и долгогодишен пасиониран колекционер на физички изданија (со особена страст кон винилите) и редовен посетител на европските но и на ретките македонски независни музички продавници.
Во изминативе четири години оваа почест ја добија Васја Ивановски (2017), Владимир Мандичевски-Манде (2018), Бранислав Димитров-Бране (2019), Гордан Калајџиев (2021) и Љупчо Јолевски (2022).
„Годинава повторно ќе се додели и специјално признание на пионерите на Македонската рок музика, за луѓето кои го воведувале винилот како медиум за траен запис на нивната музичка фасцинација. За Пионери на винилот, признанието го добива музичката група ENIGMA од Дебар, односно браќата Мимидиноски (Кенан и Зинче) како прв бенд кој доаѓа од внатрешноста на државата, а својата музика ја ставил на носач на звук – винил“, соопштува МКЦ.
Целиот славенички настан ќе биде поддржан со диџејски сетови на Илина Ангеловска, Зоки Бејбе, Томче Рутбој и Фрешко.
„Веќе се подразбира и можноста за купување на винили од АП(о)ТЕКА, со специјален попуст за тој ден од 20 %, на сите странски винилни изданија. Истовремено ја користиме и можноста за повик кон сите македонски издавачи да изнесат дел од своите изданија на продажба, на обезбедените пунктови на платото пред МКЦ. Доволно е само да се најавите“, велат од МКЦ.
