На факултетите за електротехника и информациски технологии, за информатички науки и компјутерско инженерство и на Машинскиот факултет при Универзитетот „Св. Кирил и Методиј“ од денеска до 5 април се одржува петтиот саем за вработување и пракса „Контакт“, на кој ќе се претстават 22 реномирани компании од областа на електротехниката, електрониката, машинството и информатичките науки.
Студентите ќе може да ги посетат компаниите и да слушнат за голем број успешни приказни кои произлегле од саемот.
Тие ќе имаат директна комуникација со компаниите и со работодавците, како и можности за професионално надградување и вработување.
Годинава, на саемот ќе се претстават компаниите KOSTAL, Draxlmaier, Marquardt, Asseco, Apave, Amphenol, Aptiv, EVN, LTH Learnica, GOBIVA, Netcetera, Intertec, ATS Global, doXteam, Closer, iBorn, MCA, Newman’s Business Accelerator, Pop Leads, Systems for Enterprise, StepUp.
Саемот се реализира со поддршка од ФЕИТ, ФИНКИ и МФС, од Центарот за менаџмент консалтинг, образование и наука Мотива и од Македонија 2025.