По повод четири години од постоењето на Скопје НаТочак, неформалната група организира нова тура низ градот, овој пат за да потсетат на секојдневните проблеми со кои се соочуваат велосипедистите во изминативе години. Критичната маса, 49-та по ред, ќе се одржи во среда (25 мај), а ќе тргне од Плоштад Македонија во 17:30 часот.
„Наше Скопје на точак, нашата скопска Критична маса, на крајот на мај 2016 полни четири години. Ја доживуваме оваа годишнина како возраст, како клучно време слично на она во развојот на децата. Поединечните проблеми со кои се соочуваме се многупати обработувани во темите на претходните критични маси, во многу постови, текстови, дописи, анкети.
Треба ли да ги повторуваме? Паркирани возила на патеките? До кога?
Високи рабници по патека каде треба да се движат тркала? До кога? Широки многубројни ленти за загадувачки автомобилски сообраќај наспроти тесни тротоари за мешање на велосипеди и пешаци? До кога? Брзината на автомобилите поважна од безбедноста на пешаците и велосипедистите? До кога? Четири години е добра возраст да се надминат детски проблеми.
Четири години ги шараме заедно скопските улици, градиме полека, но сигурно Критична маса! Критична маса која се проширува и низ другите градови во Македонија! Возењето секој сам секој ден е промената за која сонуваме. Тоа да се прави во безбедни услови и уживање е она за кое се бориме.
Возењето заедно секоја последна среда од месецот е начинот на кој покажуваме дека нè има, и на возачите, и на политичарите, и на сограѓаните кои не помислиле на велосипедот како потенцијален превоз, зашто немало кој да им посочи. Критична маса е нашето збирно место, каде се собираме, протестираме, бодриме и радуваме заедно. Местото каде заедно го правиме она за што се залагаме, промената, промената која сакаме да ја видиме во светот. Ние се залагаме за возење точак и ние возиме точак! Дојди на оваа Критична маса да прославиме четири години тивка, но сигурна промена“, се вели во поканата за настанот.