Градоначалникот Петре Шилегов на денешната седница на Советот на Градот Скопје информираше дека се откажува дочекот на Новата 2018 година, а средствата коишто беа планирани за организирање на прославата ќе се донираат во добротворни цели на Клиниката за белодробни заболувања.
На расправата за првичните мерки за загадувањето, Шилегов истакна дека следејќи ги препораките да не се одржуваат средби на отворено, настанот се откажува и ги повика и спонзорите да ги донираат средствата предвидени за прославата на оваа ноќ во добротворни цели.
„Ќе го повикам главниот спонзор Телеком да направиме напори тие средства да завршат таму кајшто се најпотребни“, истакна Шилегов на седницата.
Ова е вторпат прославата за Нова година да биде откажана, откако минатата година беше донесена истата одлука од слични причини.
Истовремено, од Град Скопје соопштуваат дека ќе се одржуваат предновогодишните празнични активности како базар на ракотворби, дедомразовски трки, детска програма и сл., за што дополнително информираат јавноста.