Во средните училишта, идната недела, од 25 до 29 јануари 2016 година, ќе се спроведе екстерно тестирање на учениците во завршните години во средно образование.
Според податоците на Државниот испитен центар (ДИЦ), за тестирањето се пријавени 19 931 матурант кои ќе полагаат тестови од два предмета. Распоредот со датумите за двете полагања учениците го знаат од 18 јануари, но по кои предмети ќе бидат тестирани ќе знаат три дена пред денот на полагањето на конкретниот предмет. Така што, денеска се објавени предметите за учениците кои ќе бидат тестирани во понеделник.
„Распоредите се објавени во секое училиште, тие имаат пристап, од наша страна ги добија тие распореди и потоа можат да ги симнат од апликацијата и да ги објават во училиштето. Прелиминарните резултати планираме да ги објавиме на 8 февруари. Од 8 до 10 февруари ќе трае поднесувањето приговори. На учениците што нема да поднесат приговор, првиот резултат ќе им биде конечен, а за останатите кои ќе поднесат, по разгледување на приговорот резултатот ќе биде објавен на 12 февруари“, изјави директорката на ДИЦ Мируше Ахмети.
За матурантите се опфатени 1.662 предмети. ДИЦ пред Нова година во отворен базен ги објави прашањата по сите предмети, за сите насоки на гимназиско, стручно и уметничко образование. До 8 јануари траеше можноста да се напише коментар, односно да се пријават грешки во прашањата. Од 306 поднесени коментари, 242 биле прифатени, 38 не биле и 25 биле нелогични.
Во ноември, заменик-министерот Спиро Ристовски соопшти дека Министерството за образование и наука ќе ги посетува основните и средните училишта и директно од учениците ќе бара предлози како да се подобри екстерното тестирање. Минатата година, ученици и наставници се жалеа на бројни нерегуларности во тестирањето, а револтот резултираше со неколку протести во повеќе градови.