Движењето Еко Герила тврди дека во изминатите денови различни поединци им испраќале пораки заедно со финансиски понуди со цел да ги замолчат активистите за да не реагираат за „Југохром“.
„За ова е известена полицијата и денес баравме директна средба со премиерот Зоран Заев за да го информираме за овие закани и уцени. Исто така, информацијата ќе ја споделиме и со амбасадите и организациите кои не поддржаа во нашата мисија за почиста животна средина, како и институциите на Европската Унија во Брисел, кои на нашата држава и поставија услови за започнување на преговорите: правната реформа, борбата против корупцијата и организираниот криминал и функционирањето на владеењето на правото. Сакаме да се потсетиме дека имавме уште поголеми предизвици со претходната влада, и не се повлековме, а камоли сега“, велат од Еко Герила.
Каузата на Еко-Герила, велат тие, никогаш не зависела од неколку поединци, туку од волјата и големата поддршка на граѓаните. Валканите игри со мафијашки тенденции, не само што нема да нè спречат, туку напротив, потенцираат актистите, само ги мотивираат да не се откажуваме од нивната мисија.
„Граѓанската реакција ќе биде многу оштра за секоја уцена од Југохром или од одредени кругови во Владата. Со оглед на фактот дека во 2013 година, од страна на Светската здравствена организација, Тетово беше рангиран како најзагадениот град во Европа, не смее да се толерира ниту една можна манипулација и поставување на филтрите без ригорозен надзор од независни меѓународни експерти, кој ќе утврди дали проектот и системот за филтрирање ги исполнува соодветните стандарди и го спречува ослободувањето на штетните гасови. Без веродостојна меѓународна гаранција, нема да се прифати никаква манипулација од страна на сопствениците, без разлика дали е и во соработка со Вицепремиерот Анѓушев. Затоа сметаме дека е тенденциозно и опасно неговото инсистирање на реотворањето на Југохром паралелно со воспоставувањето на филтри, а не по завршувањето на нивното распоредување и како што е предвидено со законот“, соопштува Еко Герила.
Од таму потенцираат дека официјалните мерења на Министерството за животна средина, покажале јасно дека оваа фабрика предизвикува 60% од вкупното загадување во Тетово и околината.
„‘Југохром’ треба да го плати скапо труењето на тетовчаните, бидејќи бројот на болни деца беше двојно повисок додека работеше оваа фабрика. Во 2015 година, кога работел ‘Југохром’, овој број изнесувал 31.446 случаеви, додека во 2017 година кога не работел овој број се намалил на 18.578 случаеви. Со оваа предизвикана штета од страна на ‘Југохром’, пред да ги постави филтрите, бараме од сопствениците, да платат милионски отштети и да имаат законска одговорност за загрозување на животот и здравјето на луѓето во градот Тетово и околината.
Мотивирани од случајот на Битола, каде велат беа поднесени обвиненија против раководните лица за огромно загадување, активистите ќе бараат компензација за предизвиканите болести и смртни случаи, кривично дело, казниво со 4 до 10 години затвор.
„Во исто време, вицепремиерот Анѓушев треба да знае дека здравјето и почитувањето на законот е повеќе вредно за граѓаните отколку цената на феро легурите на берзата. Ние нема да се повлечеме. Војната за почиста животна средина ќе продолжи. Нулта толеранција за убиецот!“, потенцираше Еко Герила.
Дополнето*
Вицепремиерот Кочо Анѓушев денеска рече дека нема да дозволи пуштање на „Југохром“ ако не се исполнат еколошките стандарди, а граѓаните не треба да се плашат. Според него, филтерот мора да се изгради.
„Сопственикот имаше финансиски проблеми и полека го градеше филтерот но владата не попушти и ‘Југохром’ не е пуштен да работи. Се договоривме тој да вложи еден милион евра дополнителни пари од претходно вложените а потоа како држава ќе му помогнеме да ја заврши неговата обврска. Точно е дека во полошкиот регион невработеноста е поголема но здравјето на граѓаните нема цена “, рече Анѓушев.
Во однос на тврдењата на Еко Герила за заканите и обидите за потпуп, министерот за внатрешни работи Оливер Спасовски рече дека досега нема пријава.
„Очекувам да има пријава за закани и за обид за поткуп а согласно на тоа, СВР Тетово ќе постапи согласно законот“, рече Спасовски.