Изгладнувањето, болестите и недостигот од хуманитарна помош убиваат по 300 бебиња дневно во воените зони во светот, при што бројот на деца кои страдаат поради последиците од судирите се приближува до највисоко ниво во последните 30 години, се наведува во извештајот на невладината организација „Спасете ги децата“ (Save the Children).
Според организацијата, Авганистан, Јемен, Јужен Судан, Централноафриканска Република и Сирија се помеѓу најлошите зони на судири за децата во 2017 година.
„Секојдневно се убиваат или сакатат деца, тие се регрутирани од страна на вооружени групи, киднапирани се или се жртви на сексуално насилство. Освен тоа, напаѓани се нивните училишта и им се ускратува хуманитарна помош“, соопшти организацијата.
Четиригодишната војна во Јемен уби десетици илјади луѓе, предизвика колапс на економијата и доведе милиони луѓе на раб од глад. Децата во Јемен се соочуваат со глад, дијареја, колера и дифретија, болести кои се шират исто како и обичен грип, предупредува невладината организација.
Во последните 20 година, во Африка починаа пет милиони деца бидејќи поради вооружените судири немаат пристап до основна здраствена заштита или чиста вода.
Организацијата предупредува дека во 2017 година една петтина од децата во светот односно околу 420 милиони живееле во зони на судири, што е за 30 милиони повеќе во споредна од 2016 година, а најмногу од 1990 година.
Во извештај на Обединети нации се наведува дека бројот на случаи на тешко насилство над децата – од сексуално насилство преку регрутирање во парамилитантни групи до ускратување на помош од 10.000 во 2010 година во 2017 година се зголемил на рекордни 25.000 случаи.
„Спасете ги децата“ бара поостри контроли и санкции против актерите кои го прекршуваат меѓународното право, пред сѐ правата на децата. „
„Децата и цивилите никогаш не смеат да бидат мета на напад“, нагласува Сузане Кригер, раководителка на организацијата во Германија. „Извршителите мора да бидат изведени пред лицето на правдата и ние мора да сториме сѐ за децата да бидат подобро заштитени.“