Здружението на новинарите на Македонија (ЗНМ) ги осудува заканите и навредите од, како што велат, вработени во Комунална хигиена Скопје (КХС) кон новинарката Илинка Иљоска од новинската агенција Мета.
Од здружението бараат јавното претпријатие Комунална хигиена да покренe дисциплинска постапка против одговорните лица за вербалниот напад врз Иљоска. Истовремено, тие бараат и институцијата да направи план за активности за едукација на вработените на теми од јавен интерес и однос кон граѓаните, бидејќи, како што велат, не е првпат од Комунална хигиена да реагираат на ваков или сличен начин кон граѓаните.
„Според информациите кои колешката Иљоска ги сподели со нас, утрово додека одела на работа, го фотографирала расфрланото ѓубре и метлите што биле потпрени на кантата за отпад во паркот пред нејзината зграда. Во тоа време, вработените во Комунална хигиена Скопје кои што биле во паркот, на одредена оддалеченост ја забележале како фотографира и тргнале во нејзина насока“, соопштија вчера од ЗНМ.
„Само што стасав на станицата улицата ја помина еден човек во цивилна облека и еден од чистачите. Тој во цивилна облека ми се претстави дека е раководител на што јас му се претставив со име и презиме, му кажав дека работам во Новинска Агенција Мета и му реков Повелете кажете што треба“, објаснува Иљоска.
Лицето кое се претставило дека работи во КХС, побарало од новинарката да ги избрише фотографиите и на висок тон да се расправа со неа, велејќи и дека не смее да фотографира веќе никогаш, велат од ЗНМ и додаваат дека Иљоска му рекла дека фотографирала на јавна површина и дека нема ознака дека е забрането фотографирање.
„Ми кажа дека знае која сум и дека и од друга екипа, од службата што е задолжена преку општината за косење на зелените површини знаат за мене и ме фотографираат кога се жалам дека не си ја вршат работата. Ми рекоа дека ќе видам што ќе ми се случи следниот пат кога ќе го шетам кучето. Се расправаа со мене сè додека не дојде автобусот за да ме испратат со зборовите: Ај влези си во автобус и друг пат да не правиш така“, изјави Иљоска.
Дополнително, новинарката Иљоска поради загриженост за нејзината безбедност и безбедноста на семејството, ќе го пријави случајот во полициска станица, по правната помош и советување од ЗНМ.
„Не само што јас лично не се чувствувам безбедно, туку заканата ја сфатив дека може да ми го отрујат или повредат миленикот. А стравувам дека и моите деца се во опасност затоа што и тие често го шетаат кучето. Ова не им се случува прв пат. И друг пат ми довикуваат и се жалат на нивните претпоставени кога фотографирам како не си ја вршат должноста. Но, ова денес беше прв пат да се осмелат да ми пристапат и грубо да бараат да бришам фотографии и да ми се закануваат дека нешто може да ми се случи ако продолжам да си ја вршам работата. Тие не само што знаат која сум, туку знаат и точно каде живеам“, вели Иљоска.
