Младинската иницијатива ViridiQ во недела во Градски парк (кај Школка) организира целодневен настан посветен на животот без отпад. Тие ќе организираат натпревар за намалување на отпад, размена на книги и облека, како и работилница на истата тема.
„Живеење без отпад не е само стил на живеење, туку тоа претставува филозофија на живеењето.
Што значи тоа? – Користење на производи кои би биле реупотребувани, би биле долготрајни и би се рециклирале, како и купување на производи кои би ги задоволиле нашите основни потреби“, велат од иницијативата.
„Ќе контактираш со еколошки свесни луѓе и ќе се запознаеш со можностите кои тие ги нудат во твојот град. Ќе научиш како на забавен начин и преку игра можеш да се мотивираш и успешно да ги поминеш предизвиците“, стои во најавата за настанот.
Право на учество во работилницата имаат сите млади над 15 години кои сакаат да ги позеленат своите навики и дирекно да придонесат кон заштита на животната средина.
Краен рок за пријавување е 13 јули, петок, до 20 часот. Потребно е да се пополни формуларот достапен на следниот линк.
„Отпадот кој го создаваме завршува на депониите кои ја контаминираат почвата, дел од исцедоците завршуваат во водните површини и во воздухот кој секојдневно го дишеме. Освен што ја загадува природата тој влијае негативно и од економска гледна точка бидејќи сите набавени ресурси во нашите домови не се искористени пред истекот на рокот. Од друга страна пак секоја година во светот се призведуваат вкупно 4 милијарди тони храна, а во отпад завршуваат 33% од нив, Македонија е земја во која 450.000 лица не можат да си ги дозволат сите оброци во текот на еден ден.
Кога ќе го пресечеме последното дрво, кога ја уловиме последната риба и кога ќе ја загадиме последната река, конечно ќе сфатиме дека не можеме да јадеме пари“, велат од иницијативата.
Идејата за овој настан е победничката идеја на натпреварот „Ослободи ја идејата“ кој се одржа на 6-ти јуни. Нејзината реализација е дел од проектот Академија за младински активизам, поддржан од германската фондација „Schuler Helfen Leben”.