Во Машинскиот факултет во Скопје во четврток (8 февруари) до 18 часот ќе се одржи предавање и дебата на тема „Младите и иновациите“, што се организира во рамките на меѓународната манифестација „Ноќ на идеите“, на иницијатива на Францускиот институт во Париз.
Организатор на настанот е Францускиот институт во Скопје, од каде најавуваат дека учесник ќе биде Оливје Крузе, педагошки директор на Школата 42, кој ќе ја претстави оваа високообразовна установа, како и дигиталната трансформација во образованието.
„Тој, воедно, ќе го претстави и најголемиот европски стартап инкубатор Станица Ф“, велат организаторите.
Покрај Крузе, најавена е видео презентација од Волхан Салаи, единствениот студент од Македонија на Школата 42, но и Радмил Поленаковиќ, професор на Машинскиот факултет во Скопје, кој ќе ја изложи ситуацијата на полето на иновациите на домашен план, и Кристијан Данаиловски, ко-основач на најголемата македонска компанија за анимации и визуелни ефекти, FX3X.
Модератор на дебатата ќе биде Александар Стамболиев, претседател на Фондацијата „Проф. Д-р Димитар Стамболиев“, а настанот ќе го отвори францускиот амбасадор Кристијан Тимоние.
„Ноќта на идеите“ се организира во соработка со Машински факултет, Факултет за електротехника и информациски технологии, Факултет за информатички науки и компјутерско инженерство и Фондација „Проф. Д-р Димитар Стамболиев“.