„И маалските улици се за точаци!“ е името на 69-та велосипедска Критична маса која оваа среда (31 јануари) од 17:30 часот ќе започне од скопскиот централен плоштад „Македонија“, а потоа рутата ќе заврши со дружење во Бајк Кафе Гаража.
„Големите булевари и улици се артериите на еден град: тие нѐ поврзуваат со подалечните краишта на градот. Но токму малите маалски улички се душата на секоја населба. На нив се среќаваме со нашите комшии, по нив одиме до маалската продавничка… Секој од нас научил да вози точак токму на некоја ваква уличка и тие имаат посебно место во нашите сеќавања“, велат од иницијативата НаТочак.
Потенцираат дека не беше толку одамна кога маалските улички беа безбедни и неоптоварени, што на нив можевме да видиме деца како си играат или безгрижно возат велосипеди. Денес, велат тие, сликата е поинаква.
„Лошото урбанистичко планирање и неодговорните градски политики доведоа до тоа малите маалски улици речиси целосно да ја променат нивната фунција. Во нашите маала и населби денес е речиси невозможно да се движиме пеш или со велосипед. Децата со страв одат во училиште, а велосипедистите се буквално истуркани од маалските улички. Освен колективната неодговорност, ние во нашите населби станавме и жртви на сообраќајното насилство од поединци… Заради неажурноста на одговорните речиси и да не се почитуваат строгите ограничувања на брзините во густо населените делови на градовите“, стои во најавата за Критична маса #69.
Сметаат дека маалските улици од детството денес се претворени во паркинзи и во автомобилски писти.
Оттука, велат велосипедистите, Скопје не може да биде велоград со градење на велосипедска инфраструктура само на главните сообраќајници. Секој велосипедист и пешак треба да може безбедно да стигне од својот дом и своето маало до главните велосипедски рути. Секоја општина треба да овозможи подеднакви услови за сите учесници во сообраќајот.
„Уличка по уличка, маало по маало, можеме да направиме град достоен за движење и надвор од автомобилот. Вело маало по вело маало – вело-град! Си ги сакаме назад нашите маала! Населбите треба да бидат места каде живеат луѓе кои нема да се плашат дали нивните деца ќе стигнат безбедно на училиште. Места во кои тротоарите ќе бидат ослободени за движење, а не паркиралишта за автомобили и на улиците повторно ќе се среќаваат комшии, а ѕвончињата на велосипедите ќе се огласуваат само за поздрав!“, велат од НаТочак.