Министерката за труд и социјална политика Мила Царовска на својот Твитер профил соопшти дека на денешната 41. седница на Владата е усвоен Предлог-законот за ратификација на Истанбулската конвенција.
Ова како што информираше таа значи воведување на меѓународни норми и стандарди во заштитата од секаков вид насилство.
Како што ветивме на почетокот на кампањата ,,16 дена активизам против родово базираното насилство’’ на денешната седница Владата го усвои Предлог законот за ратификација на Истанбулската конвенција, што значи воведување меѓународни норми и стандарди во заштитата од насилство.
— Mila Carovska (@mila_carovska) December 5, 2017
Одлуката беше поздравена од многумина на социјалните мрежи, бидејќи ова беше една од најголемите барања на невладините организации кои работат со жртви на родово базирано и семејно насилство веќе шест години.
Со ратификацијата на Истанбулската конвенција, од државата се очекува да воспостави правен и институционален систем кој ќе обезбеди превенција, заштита на жртвите на родово базирано насилство и прогон на сторителите. Сето ова ќе придонесе кон воспоставување на еднакви можности на жените и мажите и нулта толеранција кон било каков тип на родово базирано насилство.