Турскиот активист Осман Кавала осуден на доживотен затвор

Турски суд го осуди активистот и филантроп Осман Кавала на доживотен затвор во случајот што меѓународните сојузници на Турција рекоа дека е политички мотивиран, јавува „Би-Би-Си“.

Кавала веќе помина повеќе од четири години во затвор без да биде осуден. Тој беше прогласен за виновен за обвиненијата поврзани со националните протести во 2013 година и неуспешниот обид за државен удар во 2016 година.

Кавала ги негираше обвиненијата и ја обвини владата за „судски атентат“.

САД рекоа дека се „длабоко вознемирени“ од пресудата. Во преполниот суд на изрекувањето на пресудата присуствуваа и западни дипломати.

Кавала прво беше обвинет за оркестрирање и финансирање на антивладините протести низ целата земја што избувнаа во 2013 година. Тој беше ослободен, но набргу потоа беше обвинет дека е дел од обидот за државен удар во 2016 година, во кој десетици илјади луѓе беа затворени или останаа без работа.

Од Европскиот суд за човекови права изјавија дека нема доволно докази дека Кавала сторил прекршок и дека неговото апсење е обид да го „замолчи и да ги разубеди другите бранители на човековите права“.