Ситуацијата во Казахстан се стабилизира по неколкудневните немири кои прераснаа во брутални судири со безбедносните сили, пренесува српски „Евроњуз“.
Претседателот на Казахстан, Касим Џомарт Токајев им се обрати на граѓаните и предупреди дека армијата добила наредба „да отвори оган без предупредување“ и ја отфрли можноста за преговори со, како што наведе, „вооружени и обучени бандити“.
Властите воведоа остри безбедносни мерки во најголемите градови, а силите на Организацијата за колективна безбедност започнаа мировна операција.
Во меѓувреме, во главниот град Нур-Султан е повторно воспоставен кабловски интернет кој беше во прекин, но мобилниот интернет и понатаму не функционира.
Специјалните служби на Казахстан го приведоа поранешниот претседател на Комитетот за национална безбедност Карим Масимов под сомнение за велепредавство. Прес-службата на Комитетот соопшти дека на 6 јануари покренале предистражна постапка за велепредавство, во согласност со Кривичниот законик.
На 2 јануари во земјата започнаа протести поради поскапувањето на горивото, кои подоцна прераснаа во немири и судири со безбедносните сили низ целата земја.
Претседателот Касим Жомарт Токајев побара помош од Организацијата за колективна безбедност и силите на организацијата пристигнаа во земјата. Властите вчера соопштија дека е воспоставен уставен поредок во сите делови на земјата.
Претседателот го прогласи 10 јануари за ден на жалост поради бројните човечки жртви за време на немирите.
