Парична и хуманитарна помош, припадници на армијата и тимови за заштита и спасување, како и лекари и медицински средства ќе бидат испратени во Турција по катастрофалниот земјотрес кој го погоди југоистокот на земјата, одлучи Владата на Северна Македонија на синоќешната вонредна седница.
На седницата од Министерството за надворешни работи информирале дека има државјани од Северна Македонија во погодените подрачја во Турција, кои се наоѓаат на безбедни локации и меѓу кои нема жртви и повредени. Почесниот конзулат, според информацијата од Министерството за надворешни работи, има подготвено планови за сместување, брза медицинска помош и поддршка со храна и пијалаци за наши државјани, доколку за тоа се појави потреба.
Владата го задолжи Министерството за надворешни работи, преку дипломатско конзуларните претставништва на Република Северна Македонија во Република Турција (Анкара и Истанбул), да ги координира активностите за евакуација на државјаните на Република Северна Македонија од погодените подрачја.
Дополнително, на вчерашната седница Владата ги донела следниве заклучоци:
- Се задолжува Министерството за финансии да подготви и до Владата да достави одлука за одобрување на средства од резервите на Буџетот на Република Северна Македонија за 2023 година, во износ од шест милиони денари за помош на настраданите во катастрофалниот земјотрес;
- Се задолжуваат Дирекцијата за заштита и спасување и Центарот за управување со кризи, во координација со министерот за внатрешни работи Оливер Спасовски, итно да подготват и до Владата да достават соодветна одлука за испраќање на сили/тимови за заштита и спасување, коишто ќе се вклучат во погодените подрачја, како и одлука за испраќање хуманитарна помош за заштита и спасување во Република Турција;
- Се задолжува Министерството за одбрана во рамките на своите надлежности итно да подготви и до Владата да достави одлука за обезбедување соодветна помош во персонал, опрема во вид на механизација, шатори, душеци, ќебиња, грејни тела и друг вид соодветна помош;
- Се задолжува Министерството за здравство, во рамките на своите надлежности, итно да подготви и до Владата да достави одлука за обезбедување помош во вид на медицински персонал, медицинска опрема и лекови;
- Се препорачува, Црвениот крст на Република Северна Македонија во рамките на своите законски надлежности и можности, во соработка со надлежните институции, да се вклучи во акцијата за обезбедување помош на настраданите, со испраќање тимови и друг вид хуманитарна помош, соодветна за вакви природни катастрофи;
- Се задолжува Генералниот секретаријат на Владата во соработка со Министерството за надворешни работи, да преземе активности во насока на итно префрување на одобрените средства од Буџетот, како и да одржува редовна комуникација со Амбасадата на Република Турција во Република Северна Македонија, со цел спроведување на одлуката.
Владата одлучила и за санирање на последиците од земјотресот да се испратат 40 лица од Дирекцијата за заштита и спасување, а од оваа институција ќе биде обезбедена и комплетна специјализирана опрема за пребарување и спасување од урнатини. Дополнително ќе бидат испратени и 24 припадници на армијата на РСМ.
Во земјотресите кои вчера ги погодија Турција и Сирија досега загинаа повеќе од 4.800 луѓе, уште илјадници се повредени а непознат е бројот на луѓе кои се` уште се наоѓаат под рушевините. Најсилниот земјотрес беше со јачина од 7.8 степени по Рихтеровата скала и се случи рано наутро, кога најголем дел од жителите на погодените населени места спиеле.
