Градот Скопје и неговите жители добиваат нова Ботаничка градина која ќе се простира на 12.600 квадратни метри, и во која ќе бидат засадени над 4.600 уникатни дрвја и садници. Во Ботаничката градина ќе се постават видиковци, нова урбана опрема и бројни други содржини за посетителите, соопштуваат од Град Скопје.
Според градските власти, предвидено е во градината, која ќе биде во рамки на Зоолошката градина, да има автохтони видови растенија кои се природно распространети во Македонија, како и алохтони видови, односно растенија внесени однадвор. Исто така и ендемични растенија специфични само за Македонија.
Фото: Принтскрин од визуелизација на Град Скопје
Од Градот велат и дека подигнувањето на Ботаничката градина ќе биде од исклучително значење за граѓаните љубители на природата и на природните науки, бидејќи на едно место посетителите ќе може да ги видат содржините на Природно-научниот музеј, Зоолошката и на новата Ботаничка градина.
„Реализацијата на овој проект е дел од програмата ‘За Модерно Скопје’, за подигнување нови зелени површини, затоа што Скопје и неговите граѓани заслужуваат модерни и еколошки содржини кои ќе придонесуваат за унапредување на животната средина“, соопштуваат од Градот.
Фото: Принтскрин од визуелизација на Град Скопје
Во соопштението не стојат детали кога би била изградена ботаничката градина и колку чини нејзината реализација.
