Земјите членки на Европската Унија (ЕУ) кои одлучија да користат дополнителни „бустер“ дози на вакцини против Ковид-19 може да се соочат со зголемен правен ризик, бидејќи употребата на дополнителни дози вакцини сè уште не е одобрена од Европскиот регулатор за лекови (ЕМА), објави вчера Европската комисија (ЕК), пренесува „Ал Џазира Балканс“.
Европската агенција за лекови повеќепати истакна дека се потребни повеќе податоци пред да се одобрат дополнителни дози на вакцините, но и дека осум земји членки препорачале дополнителна доза, а многу други се подготвуваат за слична одлука.
„Одговорноста за одлуката за вклучување на ‘бустер’ вакцини во кампањата за вакцинација останува на земјите членки. Се додека дополнителните дози не се одобрени, одговорноста на компаниите се менува“, се вели во соопштението на ЕК.
Ова значи дека во случај на неочекувани несакани ефекти кои можат да бидат поврзани со ‘бустер’ дозите, земјите членки би можеле да бидат одговорни за било какви правни последици и барања за надоместок.
Комисијата посочува дека одговорноста на компаниите не престанува во целост доколку се администрираат дополнителни дози без одобрение на ЕМА.
