Организацијата за човекови права „Амнести интернешенел“ (АИ) објави дека сирискиот режим вршел илјадници убиства во затворот „Сајднаја“.
Како што стои во извештајот „Човечка кланица: масовни бесења и истребувања во затворот Сајднаја“, низ период од пет години (2011 до 2015) еднаш до двапати неделно биле водени по 50 луѓе од ќелиите на произволни судења. Луѓето биле тепани, а потоа бесени тајно, во текот на ноќта.
Вака биле убиени до 13.000 луѓе, главно граѓани кои биле сметани за противници на владата на сирискиот претседател Башар ал Асад.
Извештајот е составен врз основа на сведочења на 84 очевидци, меѓу кои имало чувари, осуденици и судии. Исто така, извештајот покажува дека сириската влада намерно одржувала нехумани услови на затворениците во „Сајднаја“ преку континуирана тортура и систематско лишување од храна, вода, лекови и медицинска нега.
Инаку, воениот затвор „Сајднаја“ се наоѓа на околу 30 километри северно од Дамаск, а во него се наоѓаат илјадници затвореници.