Пожарникарите во Грција се борат да ги зауздаат 82-та шумски пожари кои горат низ земјата, од кои 64 избувнаа во текот на вчерашниот ден, кој беше регистриран како најтопол ден од летото досега.
Поради големиот пожар на островот Родос, 19.000 луѓе беа принудени да се евакуираат, голем дел од нив туристи, а пожари се шират и на островите Евија и Крф.
На Евија, властите им наредија на жителите на четири села во јужниот дел да се евакуираат во градот Каристос кој се наоѓа на запад од територијата која е зафатена од оган.
„Пожарот можеби е на 2 километри оддалеченост, но ветрот е силен, чадот е густ и воздухот е тежок за дишење“, изјавил заменик-гувернерот на централна Грција, Јоргос Келаидитис, кој беше во близина на едно од загрозените села.
Северниот дел на Евија беше опустошен во шумски пожари во август 2021 година.
Евакуации мораа да бидат извршени и во североисточниот дел на Крф и во северните делови на Пелопонез, во близина на градот Егио. Поради ситуацијата беше блокиран сообраќајот на државниот пат кој по брегот ги поврзува Атина и Патра. Синоќа властите повикаа на нови евакуации од овие места.
Грчкото Министерство за климатски промени и граѓанска заштита, пак, соопшти дека итната состојба на Родос предизвикала досега најголема евакуација од шумски пожар во државата. Полицијата соопшти дека 16.000 луѓе биле евакуирани по копно, додека дополнителни 3.000 луѓе по морски пат од 12 села и неколку хотели. Шест лица биле кратко задржани во болница поради респираторни проблеми. Голем број туристи чекаат да се вратат дома преку лет од аеродромот во Родос. Грчкото Министерство за надворешни работи соопшти дека на аеродромот е воспоставено биро за помош на туристите кои ги загубиле своите патни документи при евакуацијата.
Jet2 where are you? No help, contact or guidance. Had to walk 4 mile in the heat across dirt tracks in smoke and ash with a 5 year old. No possessions #jet2 #rhodes #lindosimperial pic.twitter.com/iWBHtFUoYi
— Jon Hughes (@hughesy_1985) July 22, 2023
Европската Унија испрати повеќе од 450 пожарникари и седум авиони кои треба да им помогнат на грчките власти во борбата со пожарите.
Претседателката на Европската комисија, Урсула фон дер Лајен, синоќа изјави дека имала телефонски разговор со грчкиот премиер Кирјакос Мицотакис во кој му била пренесена целосна поддршка во справувањето со пожарите и топлотниот бран.
Вчера температурите во Грција продолжија да бидат екстремно високи. Дури 180 локации низ земјата имаа регистрирано температура повисока од 40 степени целзиусови. Највисоката беше измерена во градот Гитио, во јужна Грција, каде беа регистрирани 46,4 степени.
