ЗНМ: Континуиран тренд на безобразни испади на државните функционери кон новинарите

Неколку дена по последниот испад кон новинар од државен функционер, од Здружението на новинари на Македонија (ЗНМ) велат дека повторно се соочуваат со случај каде на прашање од новинарот Сенат Зулбеари упатено до министерот за здравство Беким Сали, тој наместо одговор, од министерот добива „куса лекција“ за новинарство.

Од здружението велат дека утрово во просториите на клиничката болница во Тетово, за време на прес-конференција на која биле поканети новинари и сниматели, министерот за здравство Беким Сали како и директорот на клиничката болница во Тетово Амир Елези имале непримерна комуникација и омаловажувачки однос кон дел од присутните новинари.

„Во врска со прашање на новинарите поврзано со напади кон нив од страна на обезбедувањето на болницата, Сали наместо соодветен одговор кажа ‘Да бидеме реални, новинарството е со цел да се информира јавноста, има правила, етички е службено да се доставуваат прашања до надлежните во болницата или до министерот. Во моментот кога ќе влезете без предупредување и ќе направите снимки, третирате тема, сакате да направите истражување како што се правеше во Министерството за здравство, мислам дека тука наидувате на недоразбирања, а потоа има обвинувања и нема транспарентност. Транспарентноста треба да ја барате на вистински начин и ќе ја најдете. Го снимаш лифтот, во делот на лифтот бараш и информација, нема информација поради неговиот пристап. Сфатете го како позитивна критика’“, посочуваат од ЗНМ.

Тие, како што велат, очекуваат извинување од министерот Сали кон новинарите и укажуваат дека државните функционери, се во служба на јавноста и дека не смеат да имаат непримерен и навредлив однос кон новинарите, а со тоа и кон целата јавност на која треба да и бидат пренесени информациите

Изминативе денови, од ЗНМ велат дека гласно алармирале за овој негативен тренд на непрофесионален однос кон новинари од државни функционери што бележи пораст за кој што веќе ги известиле партнерските меѓународни организации.

„Ова е петтиот негативен испад на политичар кон новинарите и медиумските работници во период од два месеци што говори дека ова веќе не се изолирани инциденти туку станува негативен тренд  на некоректен и омаловажувачки односот од страна на претставници на власта кон новинари. Ваквиот тренд без сомнеж ќе има негативна оценка во извештаите на Европската комисија како и на останати кредибилни организации што ќе се одрази негативно и на индексите за слобода на изразување во кои Македонија бележеше пораст во изминатите години“, децидни се од ЗНМ.