Здружението на новинарите на Македонија (ЗНМ) и Самостојниот синдикат на новинари и медиумски работници (ССНМ) денеска на прес-конференција реагираа на одлуката да се укинат дописништвата на Медиумската информативна агенција (МИА) од Вашингтон, Брисел и Атина, но и на најавите за значително намалувањето на буџетот на оваа медиумска куќа, со што, како што велат, се загрозува нејзината основна функција.
Новинарските организации велат дека Владата е потребно да даде итна поддршка во напорите да се изнајде решение за непречено функционирање на странските дописништва на МИА и наместо затворање на постоечките дописништва, потребно е уште посилна мрежа на дописници кои ќе работат во интерес на јавноста и во придонес на медиумскиот плурализам за прашања од јавен интерес за граѓаните.
„Истовремено, беше истакнато дека МИА треба да биде изземена од мерките за штедење, односно да се изнајде начин да не дојде до намалување на буџетот за следната година бидејќи тоа ќе предизвика негативни последици како за вработените новинари и медиумски работници, така и за квалитетот на содржините и информациите кои произлегуваат од овој медиум. МИА како генератор на вести и информативен сервис на граѓаните, треба да биде првиот филтер на информации за широката јавност и клучна алатка за борба против дезинформациите кои претставуваат се поголем проблем посебно во ерата на дигиталните медиуми“, велат новинарските организации.
Претседателот на ЗНМ, Младен Чадиковски вели дека со намалување на дописничката мрежа директно се влијае и на нарушување на професионалните стандарди на новинарите, со што се губи објективноста при информирањето, се појавува ризик од непроверени, а со тоа и неточни информации.
„На крајот жртви ќе бидат граѓаните и јавниот интерес, зошто единствен канал за информирање од овие земји ќе бидат странските канали затоа Владата нужно е да има разбирање за овој проблем и итно да реагира со цел да се превенира штета, затоа бараме веднаш враќање на парите потребни за нормално функционирање на МИА“, вели Чадиковски.
Во меѓувреме, претседателот на ССНМ, Павле Беловски вели дека, и оваа година, пред новата година наместо да се зборува за повисоки плати, нови перспективи за медиумските работници, како синдикат и медиумски партнерски здруженија се обраќаат јавно со реакција за прекин на работни договори и губење на егзистенцијата.
„Денес проблемите се во МИА, кои се предизвикани од наметнатите мерки за штедење на владата. Владата наместо да остави позитивен пример во време на криза и да ја зачува егзистенцијата и сигурноста на работните места токму спротивно удри врз единствениот медиум за кој е одговорна и го намали буџетот со кој се нарушува тековното работење. Со овој негативен пример владата прикажа негативна пракса која сега непречено може да се применува во приватниот сектор, токму онаму каде што медиумските работници се најранливи“, вели Беловски.
Актуелниот директор на МИА Драган Антоновски пак, рече дека овој процес го анализирале подолго време и дека цела година предупредувале дека тие буџети кои ним им се одредуваат се апсолутно несоодветни.
„Ние зборуваме за одржливост, наместо за инвестирање и развој. Владата постојано ни вели дека ќе го има тоа предвид, закажани се и средби за разговор. Нас ни е јасна поентата на тоа што и претседателот на ЗНМ го истакна, ние покренавме иницијатива, разговаравме со ОБСЕ, да се отвори дебата за измена на закон за медиуми, бидејќи досегашниот концепт за финансирање не е добар. Според нашите анализи, единствено можно решение за финансиска одржливост е закон за МИА, каде што меѓународните организации се понудија да помогнат во тој контекст, ставено е во програмата на ОБСЕ и ЗНМ. Тоа за нас значи некаква стабилност која ќе придонесе на континуитет, наместо да се случи на половина година измена односно повлекување на парите“, вели Антоновски.
На прес-конференцијата, дополнително беше истакнато дека согласно правните анализи кои ги има објавено ЗНМ пред речиси две години, најсоодветен начин на организација на МИА е по примерот на МРТВ, чиј основач и надлежна институција пред која полага одговорност е Собранието.
„Во таа насока, потребни се законски измени со кои ќе се гарантира дека Владата нема да има влијание во изборот на менаџментот во МИА, а истовремено ќе се обезбеди модел со кој ќе се гарантира финансиската независност во работата на оваа агенција, која со моменталниот закон е владина, а треба да биде државна агенција“, велат новинарските организации.
