Туристичката сезона во Охрид е во полн ек, водата во езерото е безбедна за капење

Туристичката сезона во Охрид е во полн ек, а водата во Охридското Езеро во крајбрежниот дел според испитуваните параметри е од прва и втора класа, односно е оценета како одлична, велат од Центарот за јавно здравје (ЦЈЗ) за Радио МОФ.

Ова е резултат на физичко-хемиските и микробиoлoшки анализи на 30 примероци на водата земени во втората половина на месецот јули.

„На 30 мерни точки-пунктови е вршена контрола на квалитетот на водата во крајбрежниот дел од Охридското езеро, од македонска страна од Св.Наум до селото Радожда“, појаснија од ЦЈЗ.

Разликите во квалитетот на водата каде што е испитувано се незначителни, велат оттаму, и додаваат дека според Уредбата за класификација на водите, води со прва и втора класа можат да се користат за капење, спорт и рекреација.

Туристичката сезона во полн ек

Главниот туристички центар во земјава деновиве традиционално е преплавен од туристи. Годинава тоа особено се забележува со големиот број домашни туристи кои одлучија одморот да го поминат во домашните туристички дестинации.

Актуелна тема деновиве беше и отпадот кој во утринските часови можеше да се забележи по охридските улици. Граѓаните преку социјалните мрежи остро реагираа за ваквата состојба. Особено вирална стана објавата на директорот на охридски Комуналец Љупчо Грданоски, на која се гледа расфрлан отпад низ целото градско подрачје.

За време на овие неколку дена ентузијасти спроведоа неколку акции за чистење на градот.

Плажите на крајбрежјето преполни, полицијата казнува за неносење маски

Атмосферата на плажите е „вжештена“ и тие се преполни со луѓе. Според фотографии и видеа кои се споделуваа од една дневна забава на плажа, се забележува дека присутните воопшто не ги почитуваат мерките за заштита. Македонските медиуми известија дека се поднесени две кривични пријави за забави на плажите Градиште два и Градиште три.

View this post on Instagram

„Лежалката на плажа лесно се заменува со болнички кревет. Да ги почитуваме мерките за заштита од ковид-19. Да го зачуваме нашето здравје, но и здравјето на нашите родители, баби и дедовци. Затоа што нема ништо поважно од грижата за нашите најблиски. Носи заштитна маска, одржувај физичка дистанца, не се групирај и често миј ги рацете“, гласи еден од апелите објавен преку Министерството за здравство, но и од министерот Венко Филипче. Со Илинденските празници и летните горештини, граѓаните бараат освежување на најпопуларната локална летна дестинација – Охрид. Додека оваа година е откажан Охридскиот маратон, на социјалните мрежи набрзо започнаа да се објавуваат фотографии и видеа од тамошната атмосфера по плажите, на кои се забележува дека воопшто не се почитуваат мерките за заштита. Конкретно ова видео е од Градиште. Автор: Ико Априлиа/Фејсбук #instanews #radiomof #covid19 #ohrid #party #coronavirus #охрид

A post shared by Radio MOF (@radiomof) on Aug 3, 2020 at 4:00am PDT

 

Според статистиката на Министерството за внатрешни работи, вчера (3 август) во Охрид биле констатирани 118 прекршоци за неносење лична заштита на лицето. Еден ден претходно пак, биле регистрирани 90 вакви прекршоци.

Министерството за здравство со апел дека вирусот не е на одмор, граѓани без дистанца по охридските плажи