„Tиииит! Инк“ организира средношколска пешачка тура низ скопското и женско културно наследство

„Tиииит! Инк“ организира средношколска пешачка тура во Скопје којашто има за цел да мапира клучни точки во градот кои се дел од историјата на општеството, како резултат на женското дејствување и акција низ годините.

Оттаму информираат дека турата е моделирана според публикацијата „Нашиот пат: 25 женски приказни од историјата“ – водич по географски точки, којшто зборува за жените кои учествувале/учествуваат во главните историски и државни текови.

„Пешачката тура ќе трае околу два часа и освен што ќе се посетуваат важни точки за женското културно наследство во Скопје, ученичките/ците ќе имаат шанса да се запознаат со приказните за овие места и подвизите на жените кои им даваат историско значење. Турата ќе ја води Ангела Стојановска“, дополнуваат од организацијата.

Сите заинтересирани за да се приклучат треба да ја пополнат пријавата за учество, а бројот е ограничен на 15 учесници. Заинтересираните мораат да го пополнат и формуларот со согласност од родител/старател.

Турата ќе обединува пет локации во Скопје, меѓу кои и Паркот „Жена Борец“, обележани преку приказните на Оливера Јоциќ, Мимоза Несторова Томиќ, килимарските работнички и Есма Реџепова.