Скопските инспектори викендов казнувале за горење и фрлање отпад

Град Скопје информира дека екипи на градскиот Инспекторатот, составени од комунални инспектори и инспектори за животна средина, изминатиов викенд изрекле казни за палење оган на отворено, како и за недозволено фрлање отпад.

„Затекнати и санкционирани се лица кои палеле оган на отворено во Шуто Оризари за што се изречени две казни. Во општината Бутел, пак, во близина на последната автобуска станица на линијата број 57, фатено е лице како незаконски фрла отпад, за што истото е казнето“, соопштува Градот.

Од таму дополнуваат дека изминатиов викенд комуналните редари изрекле 11 казни на физички лица за непочитување на законските прописи и фрлале ѓубре на јавна површина во Градскиот парк.

„Градот Скопје го продолжува засилениот инспекциски надзор на јавните површини. Неселективно ќе се изрекуваат казни за сите што не го почитуваат законот, ја загадуваат животната средина и го загрозуваат животот и здравјето на граѓаните“, се вели во соопштението.

Фото: Град Скопје