Тројца малолетници нападнале и повредиле ЛГБТИ лица во центарот на Скопје по завршувањето на Парадата на гордоста, соопштија организаторите. Сторителите се пронајдени и ќе се соочат со отежнувачката околност на дело сторено од омраза, информираат од „Скопје прајд“.
„Цената на нетолеранцијата кај нас редовно и најмногу ја плаќаат младите, и како жртви, и како извршители на кривични дела од омраза, и тоа е една од главните пораки што сакаме да бидат чуени. Не може сеењето омраза да се пакува како вистинска грижа за децата“, стои во нивното соопштение.
Покрај ова, од „Скопје прајд“ периодов забележале засилен говор на омраза по основ на сексуална ориентација и родов идентитет, а повеќе пријави се веќе поднесени до Министерството за внатрешни работи.
Но, според нив, очекувано е Парадата да биде повод за експлозија од коментари на социјалните мрежи.
„Нападот по Прајдот беше еден брз „reality check“ и тоа додека уште траат моментите на добро исполнет и радосен ден. Отрезнување кон она што сите добро го знаеме, дури и кога инспиративната атмосфера на заедништво и солидарност ќе нѐ направи еуфорични. А тоа е дека борбата е постојана и дека меѓу деновите кога славиме протестирајќи, и понатаму е потребно засолниште за прогонетите, психолошка поддршка на трауматизираните, правна помош, здравствена и социјална грижа и други начини да им се излезе во пресрет на најранливите и помалку привилегираните. Организациите-членки на НМХТ се целосно посветени на оваа мисија и продолжуваме со сите свои сили, љубов и ентузијазам да работиме на промените. Без сомнеж и без оглед на етикетите, што од разни страни ги добива нашиот граѓански активизам“, се вели во соопштението од „Скопје прајд“.
Според нив, она што ја прави парадата за успешна е чувството на слобода и сигурност за време на настанот.
