Петтото, јубилејно издание на Интернационалниот фестивал за филмови снимени со мобилен телефон – Мобил Фестивал ќе се одржи oд 27-ми до 29-ти ноември во Скопје.
Овогодинешната главна награда за најдобар филм е посветена на Ратка Илиевска – Лале, жената што според организаторите сиот свој живот го посветила на филмот и преку својата работилница „Едвуд“ едуцирала огромен број филмаџии, писатели и уметници.
Фестивалот е во организација на КТ Филм&Медиа од Битола, а филмовите кои ќе бидат прикажани за време на фестивалот ќе се прикажуваат и низ неколку градови во Македонија.
Крајниот рок за аплицирање е 20-ти ноември, а секој што ќе прати филм после овој рок ќе конкурира за наредниот фестивал во 2015. Конкурсот е отворен за секој кој ќе испрати филм снимен со мобилен телефон што не трае повеќе од 10 минути.
Мобил Фестивал е со меѓународен карактер и е единствен фестивал од ваков вид во регионот. Филмовите од Мобил Фестивал добиваат и своја промоција на најголемите светски фестивали од овој вид како International Mobil Film Festival од Сан Диего, САД, MINA (Mobile Innovation Network Aotearoa) од Нов Зеланд, Hong Kong Mobile Film Festival (HKMFF) од Хонг Конг, Seoul international Extreme-Short Image & Film Festival (SESIFF) од Јужна Кореја , CINEPHONE од Барселона, Шпанија, Teheran Mobile Film and Photo Festival од Иран и други.