Непосредно пред новогодишните празници, Министерството за внатрешни работи отвори бесплатна телефонска линија на која граѓаните анонимно ќе можат да пријават журки и организирани славења по викендици и изнајмен простор.
Миинстерот Оливер Спасовски во своето гостување во Утрински брифинг на Слободна ТВ, ги повика граѓаните да помогнат пријавувајќи вакви случаи на бројот 0800 00 201 и со тоа како што истакна, да бидат партнери во спречувањето на ширењето на вирусот.
„Полицијата ќе постапи по пријавите и ќе преземе мерки во координација со јавното обвинителство за санкционирање на непочитувањето на мерките и препораките кои произлегуваат од Законот за заштита на населението од заразни болести односно Одлуките кои ги носи Владата на Република Северна Македонија“, стои во соопштението на МВР.
Спасовски најави и поригорозни контроли за празниците во насока на почитување на мерките за заштита од ширење на коронавирусот.
Викендов, соопшти тој, извршиле 1 300 контроли, а прекинале 15 забави и откриле дрога и оружје.