МОН: Одлуката за пониска цена на струјата за училиштата значи континуитет на наставата со физичко присуство

Владината мерка за снабдување на училиштата со електрична енергија по субвенционирана цена од 95 евра за мегават/час е голема поддршка за непречено организирање на наставата во форма која е од најголем интерес за учениците, со физичко присуство во училниците, велат од Министерството за образование и наука (МОН).

Оттаму додаваат дека вкупно 366 основни општински училишта и 109 јавни средни училишта добиваат поддршка од државата заради непречена работа и реализација на мисијата заради која и постојат, едукација на младите.

„Во услови на прогласена кризна состојба, со склучување на договор за снабдување со електрична енергија со ЕСМ Продажба, тие ќе создаваат значително помали расходи во општинските и државниот буџет, со што, се зголемува сигурноста дека воспитно – образовниот процес во училиштата ќе продолжи да се реализира непречено до крајот на годината“, додаваат од МОН.

Истовремено, од министерството апелираат до сите образовни институции и установи доследно да се почитуваат владините препораки за рационално користење на електричната енергија.

„Затоа што, штедењето на електричната енергија е еден од факторите кои влијаат на одржливоста на наставата во училниците, но од друга страна се подигнува стабилноста на енергетскиот систем и се обезбедува доволно електрична енергија за потребите на домаќинствата“, децидни се од МОН.