Министерството за образование и наука (МОН) и Владата понудиле бесплатно сместување, правна помош и исхрана во студентските домови на студентите од погодените подрачја од земјотресите во Турција кои студираат во македонските универзитети. Како што велат од МОН, целта е овие студенти полесно да го надминат тешкиот период во кој се наоѓаат поради огромните човечки и материјални загуби во своите родни места.
Ова го најави министерот за образование и наука Јетон Шаќири при посетата на Меѓународниот балкански универзитет, каде во моментов студираат 100-тина турски државјани.
„Многу од овие студенти загубија членови на своите семејства, ги загубија домовите, а некои загубија буквално сè и потребна им е поддршка. Дојдов да поразговарам со нив, да ги слушнам нивните потреби и секако да ги известам што ние како министерство можеме да понудиме, за да се ублажи ситуацијата во која се наоѓаат, рече Шаќири.
Според информациите кои министерот ги добил од студентите, тие најчесто имаат потреба од дополнителни финансии заради намалување на секојдневните трошоци кои, како што рече, нивната потпора во родните места, не е во можност да ги поддржи и покрие во моментот. Во таа насока, веднаш им е предложено бесплатно сместување и исхрана во државните студентски домови.
Шаќири потенцираше дека на студентите им е понудена и правна поддршка, согласно капацитетите на министерството, така што секој студент може да се обрати до МОН и да дојде во просториите на правната служба и да се консултира за тоа што е негов фокус.
„МОН ќе поднесе и иницијатива до Владата за обезбедување на еднократна парична поддршка за секој студент од погодените подрачја, но дополнително ќе ги известиме студентите и јавноста за одлуката, бидејќи за овие фискални импликации, се консултираат повеќе страни и институции“, рече министерот.
Во државата има околу 200 турски студенти само во Скопје и во Штип, кои доаѓаат од погодените подрачја и дел од нив веќе побарале одредена помош од факултетите каде студираат.
