Компаниите и владините корисници на Твитер во иднина можеби ќе треба да плаќаат одредена „мала сума“ доколку сакаат да останат на оваа социјална мрежа, најави сопственикот на Тесла, Елон Маск.
Оваа новост доаѓа откако управниот одбор на Твитер ја прифати неговата понуда да ја купи платформата за 44 милијарди долари.
Сепак, Маск истовремено посочи дека социјалната мрежа ќе остане бесплатна за обичните корисници.
Twitter will always be free for casual users, but maybe a slight cost for commercial/government users
— Elon Musk (@elonmusk) May 3, 2022
Твитер досега не одговориле на прашањата од Би-Би-Си во врска со најавите за наплата на Твитер на компаниите и владините институции.
Откако ја изрази својата намера за купување на Твитер, Маск најави дека сака да внесе новини во начинот на кој функционира социјалната мрежа. Тој најави воведување на нови услуги и сугерираше промени во премиум претплатничкиот сервис „Твитер Блу“, отстранување на ботови од платформата, како и воведување на опција за промена на твитови.
Во говор во Њујорк оваа недела, Маск изјави дека сака да го направи Твитер транспарентен за тоа како се зголемува и намалува видливоста на твитовите и потенцираше дека сака софтверот да биде достапен за критики од јавноста.
Маск изминатиов период јавно коментираше дека политиките на модерирање содржини на социјалната мрежа се закана за слободата на говор.
