Град Скопје: Започнавме постапка за првиот мега парк во Ѓорче Петров на површина од над 30.000 квадрати

Град Скопје информира дека по иницијатива на градоначалничката Данела Арсовска, градскиот Совет вчера донесе одлука за воспоставување меѓуопштинска соработка помеѓу Град Скопје и Општина Ѓорче Петров за партерно уредување и озеленување на просторот меѓу реката Лепенец и пречистителна станица Волково во Ѓорче Петров.

„Новиот парк ќе биде лоциран на опустошениот простор на исчистена депонија, што се наоѓа покрај коритото на реката Лепенец и пречистителна станица Волково, во општина Ѓорче Петров. Истиот ќе се простира на вкупна површина од 30.900 квадратни метри, од кои за зелени површини се планирани 17.534 квадратни метри, а за пешачки патеки 13.366 квадратни метри“, соопштува Град Скопје.

Со изградбата на новиот парк и уредувањето на просторот, каде што се планира и да се засадат 2.250 садници и грмушки, велат од Градот, ќе се овозможи активно користење на зелените површини и движење на пешаците и велосипедистите.

„Во реализацијата на овој проект Град Скопје ќе учествува со геодетски снимања, изработување на проектна документација, расчистување на теренот, изградба на пешачки површини, изградба на бунари за наводнување со подземни води,  поставување урбана опрема, хортикултурно уредување на зелена површина и садење на садници. Градот Скопје за реализацијата обезбеди и финансиски средства од својот Буџет. Општина Ѓорче Петров во остварувањето на оваа соработката ќе учествува со изградба на урбана опрема – детски игралишта и реквизити, како и со проект за осветлување“, се вели во соопштението на Градот.

Од таму дополнуваат дека вкупната вредост на проектот изнесува 68.500.000 денари, од кои Град Скопје ќе учествува со 67.000.000 милиони денари, додека Општина Ѓорче Петров со 1.500.000 денари.