Министерство за транспорт ја започна постапката за склучување Спогодба за воздушен сообраќај со Кралство Саудиска Арабија, со цел воспоставување редовни авиолинии меѓу двете држави. Досега меѓу Македонија и Саудиска Арабија не се одвивал директен воздушен сообраќај.
Од Министерството информираат дека Спогодбата ќе создаде јасна правна рамка за работа на авиопревозниците, обезбедувајќи либерални и фер услови на пазарот. Се очекува тоа да поттикне поголема конкуренција, пониски цени за патниците и воведување нови и поквалитетни услуги. Истовремено, договорот ќе гарантира високо ниво на безбедност и сигурност во воздушниот сообраќај, во согласност со меѓународните стандарди од областа на цивилното воздухопловство.
Од ресорното министерство нагласуваат дека Македонија и Саудиска Арабија негуваат пријателски односи и имаат заемна заложба за унапредување на економската и трговската соработка, зголемување на инвестициите и продлабочување на соработката во повеќе области од заемен интерес.
Се очекува воспоставувањето на редовни авиолинии да придонесе за зголемување на економската активност, туристичките текови и трговската размена, како и за зајакнување на севкупните билатерални односи.
Министерството за транспорт во наредниот период ќе ги преземе сите неопходни чекори за започнување на официјалните процедури и усогласување со националните прописи и меѓународните стандарди, со цел што побрзо регулирање и воспоставување на воздушниот сообраќај меѓу двете земји.
