Здружението на новинари на Македонија (ЗНМ) ги осудува заканите на симпатизерите на Демократската унија за интеграција кон екипата на телевизијата „Шења“, кои, велат тие, вчера биле попречени да известуваат за комуналните проблеми во скопската општина Чаир.
„Ги повикуваме надлежните институции да ги идентификуваат насилниците и да ги изведат пред лицето на правдата. Насилството против новинарите и медиумските работници е неприфатливо и претставува напад врз демократијата“, реагира ЗНМ.
Здружението потенцира дека државата има обврска да обезбеди ефикасен систем на превенција и казнување на насилството врз новинарите. За ЗНМ тоа е основен предуслов за подобрување на состојбата со слободата на говорот.
„ЗНМ, исто така, ја поздравува изјавата на премиерот Зоран Заев, кој денес ги осуди заканите кон ТВ Шења и повика да се истражи случајот и да се казнат насилниците“, се вели во соопштението од Здружението.