Во киното „Фросина“ во Младинскиот културен центар во Скопје вечер (22 октомври) по 21 часот ќе се случи концерт на „Tout Bleu“, кој се прави во соработка меѓу „Розе кадилак“ и „5060“.
Организаторите посочуваат дека „Tout Bleu“ започнува како проект на Симон Убер, мултиинструменталистка од Женева, позната по својата работа во „Massicot“ и „Hyperculte“ – бендови кои го дефинираа новиот бран на швајцарската авангардна и DIY (направи сам) сцена.
Од истата заедница произлегуваат издавачите и колективите како „Bongo Joe Records“ и „Orchestre Tout Puissant Marcel Duchamp“, кои го поврзуваат експерименталниот звук на градот со пошироката европска алтернативна сцена.
„‘Tout Bleu’ ја слават слободата на звукот и просторот без ограничувања и компромиси. Се движат со силен ритмички пулс, хипнотични гудачи (виола и виолончело) и етеричен вокал со надреална димензија што трепери помеѓу шепот и крик. Нивната музика вткајува размислувања за времето, отпорот и колективната свест, создавајќи звучен пејзаж што се протега од кревка акустика и суптилни мелодии до експресивни електронски и пост-панк текстури. На сцената, оваа четворка вибрира како едно тело, истовремено ранливо и моќно, во интимен ритуал што повикува на движење и транс“, стои во најавата за настанот.
Освен Симон Убер, бендот го сочинуваат Лучијано Туреља, Беатриз Раимундо и ПОЛ.
Билетите може да се набават онлајн по 400 денари, или на врата од 500 денари.
