И покрај континуираното намалување на класичното пушење, младите во Европа сè почесто користат електронски цигари и нови ароматизирани никотински производи, предупредува Европската канцеларија на Светска здравствена организација (СЗО), пренесе Euronews.
Според најновиот извештај, 53 земји од Европа и Централна Азија се на пат до 2030 година да останат регион со највисока потрошувачка на тутун во светот. Директорот на СЗО за Европа, Ханс Клуге, изјави дека тутунот веќе предизвикува повеќе од 1,1 милиони смртни случаи годишно од незаразни болести во регионот. Без забрзани мерки, Европа ризикува да стане регион со најлоши резултати во контролата на тутунот.
Во 2024 година, околу 173 милиони луѓе во европскиот регион користеле тутун. Особено загрижува податокот дека околу четири милиони деца на возраст од 13 до 15 години користат тутунски производи. Употребата на електронски цигари е во пораст, при што 14,3 проценти од децата во оваа возрасна група ги користат, со речиси еднаква застапеност кај момчињата и девојчињата.
Меѓу возрасните, Европа со 31,4 милиони корисници е втора во светот по употреба на електронски цигари, веднаш зад Северна и Јужна Америка.
Дополнително, Европа е единствениот регион каде што не се очекува да се исполни целта за намалување на употребата на тутун кај жените за 30 проценти до 2025 година. Наместо тоа, од 2010 година се бележи пад од само 12 проценти. Повеќе од 40 проценти од жените пушачи во светот живеат токму во овој регион, со преваленција од 17,2 проценти, речиси двојно повеќе од онаа во Америките. Во дел од земјите, употребата на електронски цигари е повисока кај девојчињата отколку кај момчињата.
Фото: Freepik
