Самостојниот синдикат на новинари и медиумски работници (ССНМ) најостро реагира на новото попречување на професионалното извршување на новинарската задача на екипата на ТВ М Нет од Штип и снимателoт Виктор Ефремов, за кои велат дека со непречени услови за работа се стекнале дури по пријава и по полициската интервенција.
„Колегите новинарите мора да бидат заштитени при извршување на својата обврска, а таа во основа е од интерес на граѓаните и бара против попречувачите итно да бидат покренати соодветни пријави“, нагласува ССНМ.
Со најновиот случај во Штип кога на екипата на М Нет од физичко лице им беа упатувани закани и погрдни зборови, ССНМ заклучува дека државата на ова поле и не постигнала кој знае каков напредок што се должи на досегашната пракса нападите, етикетирањата и деградацијата да минуваат без санкции.
„Не можам да си одам, јас сум исто како и полицијата што е тука“, беа реакциите на снимателот, кој близу 20 минути беше попречуван да си ја изврши работната задача.
Синдикатот во исто време реагира и ги осудува и непримерните коментари под видеото емитувано во живо на социјалните мрежи.
„Сметаме дека и во нивниот случај мора да постои противмерка односно форма која ќе го запре говорот на омраза кон професионалците во медиумите кои се на должност“, реагираат од Сојузот.
